قدماں نُوں چُم کے روڑے، ہیرے تے لعل بن گئے
سوہنےﷺ دے دَر دے ذرّے، بدر و ہلال بن گئے
جِنہاں تے نظراں پئیاں رب دے حبیبﷺ دِیاں
مدنی کریم دِیاں، جگ دے طبیب دِیاں
حضرت اویسؑ بن گئے، حضرت بلالؓ بن گئے
کعبے دا نوری اُجالا، جالی حضورﷺ دی اے
عرشان توں اعلیٰ و ارفع، جالی حضورﷺ دی اے
جالی نُوں چُمن والے، غوث، ابدال بن گئے
مُرسل غلام سارے، میرے حضورﷺ دے نیں
جگ تے نظارے سارے، اوسے حضورﷺ دے نیں
بدّو صحابی بن گئے، نظراں دے نال بن گئے
لبّاں تے مُہراں لگیاں، بولن دی جاچ بُھل گئی
اوتھے زبان تائیں کھولن دی جاچ بُھل گئی
جا کے مدینے اتھرو میرے سوال بن گئے
طیبہ دی یاد آ کے سینہ جلائی جاوے
جھلّی نہ میرے کولوں لمبی جدائی جاوے
سائم جدائی اندر گھڑیاں دے سال بن گئے