Kaho mujh sey muhabbat hai.. !!"
Mohabbat ki tabeeyat main
Yeh kaisa bachpana qudrat ne rakha hai !
Ke yeh jitni puraani jitni bhi mazboot ho jaye
Issey taeed-e-taaza ki zaroorat phir bhi rehti hai
Yaqeen ki aakhri had tak dilon mein leh'lahaati ho
Nigaahon se tapakti ho, lahuu mein jag'magaati ho
Hazaaron tarah se dil'kash, haseen haaley banati ho
Issey izhaar ke lafzon ki haajat phir bhi rehti hai !
Mohabbat maangti hai yun gawahi apney honey ki
Ke jaise tifl-e-sadaa shaam ko ek beej boye
Aur shab mein baarha uthey
Zameen ko khod kar dekhey
Ke paudaa ab kahan tak hai !
Mohabbat ki tabeeyat mein ajab takraar ki khuu hai
Ke yeh iqraar ke lafzon ko sun'ney se nahin thakti
Bicharrney ki ghari ho ya koi milney ki saa'at ho
Issey bas aik hi dhun hai
Kaho mujh se mohabbat hai !
Tumhain mujh se mohabbat hai !
Kuch aisi bey-sukooni hai wafa ki sar-zameenon mein
Ke jo ahl-e-mohabbat ko sadaa beychain rakhti hai
Ke jaise phool mein khushbu, ke jaise haath mein paara
Ke jaise shaam ka taara !
Mohabbat karne walon ki sahar raaton mein rehti hai
Gumnaam ki shaakhon mein aashiyaan bantaa hai ulfat ka
Yeh ain wisaal mein bhi hijr ke khadshon mein rehti hai
Mohabbat ke musafir zindagi jab kaat chuktey hain
Thakkan ki kirchiyan chuntey, wafa ki ajrakein pehney
Samay ki rah'guzer ki aakhri sarhad pe ruktey hain
To koi doobti saanson ki dori thaam kar
Dheerey se kehta hai
Ke yeh sach hai na !
Hamari zindagi ik doosrey ke naam likhi thi
Dhundhlaaka sa jo nigahon se qareeb-o-door phailaa hai
Issi ka naam chahat hai
Tumhain mujh se mohabbat thi !
Tumhain mujh se mohabbat hai !
Mohabbat ki tabeeyat mein
Yeh kaisa bachpana qudrat ne rakha hai !!
