Ye koi sochi samjhi tehreer nahi'n bus aisey hi aaj kuch logoo'n ki yad aai tu socha isko zabt-e-tehreer mai'n laoo'n aur aap sub k sath bhi share kroo'n key ye koi afsana nahi'n haqiqet hey
Main hal sey jub thek jata hoon to mazi main kho jata hoon
jo log kabhi thay sath merey main un sey milney jata hoon
sub khush hain kaisi masti hey main hansta gata jata hoon
phir janey kaisey din aaye main tanha hota jata hoon
kuch rastey main hi chor gaye kuch sey ab bichra chahta hoon
kuch phool duaain sath liye main sub ko dhondta jata hoon
ab main phir sey tanha hoon chahata hoon mazi main kho jaoon
jo log kabhi thay sath merey un sub sey ja ker mil aaoon
Mujhey nahi’n maloom k aisa sirf mairey sath hi hota hey ya aur log bhi in ehsasaat ka shikar hotey hai’n laikin aisa hota zaror hey jub khushgawar batai’n aur yadai’n aankhai’n aansoo’n k motoyoo’n se bher daiti hai’n jub insan bhiereh mai’n bhi apney aap ko tanha pata hey tu phir yad’dasht k jahaz per sawar mazi k jazeeroo’n ka safer shoro kerdaita hey tu kia kia kuch aankhoo’n k aagey nahi’n aajata aur mai’n is waqt mazi k safer pey hoo’n tu aaiye aap logoo’n ki bhi un sey ek mukhtaser si mulaqat kerwata hoo’n
ye hamari walida muhterma hai’n buhat muhabbet kerney wali aur khandan ki sub se bari her koi un ki baat manta hey buhat muhabbet di unhoo’n ney, aaj mai’n jo kuch hoo’n us mai’n un ki muhabbet aur terbiyet ka buhat bara hissa hey her jagha mairey hi sath jati hai’n laikin 27th December, 1993 ko mairey daikhtey daikhtey chali’n gai’n aur mai’n baitha daikhta hi reh gaya
Aaiye zara bahir chaltey hai’n aur aap ko apney dostoo’n se milwatey hai’n, Ye Karaci University hey hamara department Economics hey ye jo samney wali rahdari hey ye Arts loby se hoti hui Economics Department tek jati hey ye lijiye seedhey hath per hamara department hey yaha’n hum ney buhat acha waqt guzara hey Ye jo samney ek group nazer aaraha hey na ye hamara group hey jiska naam hum ney Talanga group of Economics rakha tha, mai’n khud ko bhi un k dermiya’n daikh sakta hoo’n in mai'n girls bhi hai'n aur biys bhi aap in ki surat per maat jana ye shakel se masoom zaror dikhtey hai'n laikin shaitan bhi in se panha mangta hey, yaha’n hum ney buhat cricket khaili hey kitna acha waqt tha na koi fiker na praishani jub class attend kerney ka mod na hota tu mujhey yad hey hum apney professor sahib k office ki bahir se kundi laga daitey they kabhi aur nai nai qisem ki sharartai’n kertey ek bar tu sirf shert jeetney k liye purey department mai’n apni ek friend ka dopat’ta pehen ker ghoomey, kabhi main library mel mel k kurtey aur chori dar pajamey mai'n malboos ser per dopal'li topi aur monh mai'n pan daba ker mahfil-e-mushaira kertey tu kabhi canteen mai’n party tu kabhi sports week ki ronaqai’n tu kabhi students week k hangamey kis department mai’n hamarey dost moujod na they Kitni khobsurat tha wo waqt
Aaj mai’n shahra-e-hayaat per plat ker daikhta hoo’n tu un mai’n se koi bhi tu aas pass nazer nahi’n aata dil chahta hey k kash mairi zindagi mai’n koi revind ka option ho tu kch peechey plat ker ek bar phir wo waqt jeeyoo’n dil chahta hey k un se miloo’n mager zindagi mai’n sub kuch waisa hi tu nahi’n hota jaisa hum chahtey hai’n, Aaj zindagi buhat masroof hey itna waqt bhi tu nahi’n milta keh k insan mazi ki qaber hi khood daley k shayed mazi ki haseen yadain hal ki talkhiyoo’n se frar mai’n maded de sakai’n
...................................
